Паэтка Таццяна Рускуле падзялілася “асколкамі ўспамінаў”

29 лістапада 2016 года ў даўгаўпілскім Цэнтры беларускай культуры прайшоў творчы юбілейны вечар паэткі, члена Саюза пісьменнікаў Расіі і рускай пісьменніцкай арганізацыі Латвіі Таццяны Рускулэ. Аўтар прадставіла чытачам новы, ужо пяты па ліку, зборнік вершаў пад назвай“Воспоминаний осколки”.

Імя Таццяны Рускулэ добра знаёма знатакам паэзіі. З'яўляецца членам Саюза пісьменнікаў Расіі і Рускай пісьменніцкай арганізацыі Латвіі. Прымала ўдзел у літаратурна-паэтычных конкурсах і фестывалях у Латвіі, Эстоніі, Германіі. Друкуецца ў альманахах «Русло» і «Резекне», газетах і партале www.stihi.ru . У вершах Т.Рускулэ прасочваецца тонкая філасофская нітка, а любоўная лірыка працята як радасцю, так і сумам.

Першы зборнік вершаў «С любовью от Анны» выйшаў у 2007 годзе. Затым з'явіліся на свет кнігі «По улицам расхлёстанных дождей» (2008), «Колыбельная для мамы» (2010), «За гранью сна» (2012). Зборнік «Воспоминаний осколки» паэтка прысвяціла памяці сваіх бацькоў, бо ў жыцці няма нікога бліжэй і даражэй, чым родныя людзі.

Юбілейная вечарына пачалася з узнагароды. Кіраўніца Цэнтра беларускай культуры Жана Раманоўская, павіншаваўшы паэтку з юбілеем, уручыла Таццяне Рускулэ падзячную грамату Даўгаўпілскай гарадской думы - за актыўны удзел у грамадскай дзейнасці Даўгаўпілса, творчыя дасягненні і ў сувязі з 50-годдзем. 

На творчым вечары гучалі праніклівыя вершы Таццяны Рускулэ. Сустрэчу аўтара з чытачамі музычна ўпрыгожыў вакальны ансамбль сеньёраў «Спадчына», які праспяваў песні на рускай і беларускай мовах.

Віншаванні з юбілеем і новым зборнікам гучалі з вуснаў паэтаў Паўла Плотнікава і Яўціхія Канаплёва, паэтак Людмілы Вілюмы і Настассі Сазанковай, мастачкі Марыі Сафронавай, члена таварыства «Уздым» Валянціны Анікінай. А паэт Яўген Голубеў прысвяціў Таццяне Рускулэ верш «Ангел».

Інфармацыя падрыхтавана:

Цэнтр беларускай культуры,

т. 654 24695, 20374840, Гэты адрас электроннай пошты абаронены ад спам-ботаў. У вас павінен быць уключаны JavaScript для прагляду., www.bkc.daugavpils.lv

г.Даўгаўпілс, вул.Смілшу, 92,

Палац культуры, ЦБК - 3 паверх, каб. 305-306