Да 160-годдзя Райніса гучалі вершы і прысвячэнні

10 верасня 2025 года, у рамках Дзён паэзіі, у Цэнтры беларускай культуры Дома адзінства (ЦБК) прайшла літаратурная вечарына “Разам з Райнісам”, прымеркаваная да 160-годдзя з дня нараджэння вялікага латышскага паэта.

Для беларусаў Райніс (1865-1929) – асоба амаль сакральная. Класік латышскай літаратуры быў абаронцам беларускай нацыянальнай культуры ў міжваеннай Латвіі і прадстаўніком латвійскіх беларусаў у Сейме. Пра гэта слухачы даведаліся з лекцыі кіраўніцы ЦБК Жанны Раманоўскай.

Літаратурны вечар адкрыўся вядомай песняй на словы Райніса “Karoga dziesma” і праглядам невялікага фільма “Райніс і Даўгаўпілс”, знятага ЦБК пяць гадоў таму. У канву мерапрыемства лагічна ўпісаліся ўспаміны пра Райніса яго сучаснікаў, вядомых дзеячаў беларускай дыяспары Канстанціна Езавітава і Уладзіміра Пігулеўскага.

На мерапрыемстве прагучалі вершы Райніса на латышскай мове, на беларускай у перакладзе паэтаў М. Арочкі, Р. Барадуліна і П. Сакола, а таксама вершаваныя прысвячэнні паэтак В. Гаротнай і А. Кавалюк.

У паэтычны вянок свае вершы, прысвечаныя класіку латышскай літаратуры, напісаныя ў розныя гады, упляталі даўгаўпілскія паэты Станіслаў Валодзька, Валянціна Пруднікава, Фаіна Осіна, Яўген Голубеў, Анатоль Галлер. Прагучала некалькі вершаў у перакладзе беларускага паэта Сяргея Панізніка, радкі пра Райніса паэтаў А. Гузіка і М. Жукава.

Музычным афармленнем літаратурнай вечарыны “Разам з Райнісам” прагучалі песні ў выкананні ансамбля беларускай народнай песні “Купалінка” і барда Анатоля Галлера.

Інфармацыя падрыхтавана:

Марыя Памецька,

метадыст Цэнтра беларускай культуры

т.: +371 65424695, 29811969

эл. пошта: Гэты адрас электроннай пошты абаронены ад спам-ботаў. У вас павінен быць уключаны JavaScript для прагляду.