Зімовыя радасці пачаліся з Піліпаўскіх вячорак

11 снежня 2024 года ў Цэнтры беларускай культуры Дома адзінства (ЦБК) беларускім абрадавым святам “Піліпаўскія вячоркі” пачалася серыя калядных мерапрыемстваў “Зімовыя радасці”.

Піліпаўскія вячоркі – адна з нацыянальных традыцый у беларусаў падчас перадкаляднага посту. На вясковых вячорках дзяўчаты пад песні ткалі, пралі, займаліся рукадзеллем, расказвалі пацешныя гісторыі. А пасля працы, нягледзячы на ​​пост, моладзь гуляла ў розныя народныя гульні, спявала і танцавала.

Паглядзець старажытны звычай і паўдзельнічаць у ім у Цэнтр беларускай культуры прыйшлі як гараджане, так і замежныя госці – студэнты Даўгаўпілскага ўніверсітэта.

Удзельнікі ансамбля беларускай народнай песні “Купалінка” тэатральна абыгралі ўсе элементы Піліпаўскіх вячорак: пад расказы пра традыцыі свята пралі, вязалі і вышывалі, спявалі песні і прыпеўкі, жартавалі, танцавалі і гулялі ў розныя гульні.

Госці і ўдзельнікі вечарыны з азартам гулялі ў народную гульню “Падушачка”, падпявалі беларускія песні, чыталі вершы, а таксама мелі магчымасць паўдзельнічаць у майстар-класе і зрабіць саламянага павука-абярэга, пакаштаваць посныя стравы беларускай кухні, якімі Гаспадыня традыцыйна частавала ўсіх у канцы вечара.

Цыкл мерапрыемстваў “Зімовыя радасці” працягнецца ў суботу, 14 снежня, у 12.00, у ЦБК (вул. Алеяс, 68-1А, Даўгаўпілс) святам беларускага арнаменту “Калядныя матывы”.

Інфармацыя падрыхтавана:

Марыя Памецька,

метадыст Цэнтра беларускай культуры

т.: +371 65424695, 29811969

эл. пошта: Гэты адрас электроннай пошты абаронены ад спам-ботаў. У вас павінен быць уключаны JavaScript для прагляду.