Творчы дуэт падарыў даўгаўпілчанам вечар натхнення

19 снежня 2017 года ў Даўгаўпілскім Цэнтры беларускай культуры (ЦБК) з аншлагам прайшоў музычна-паэтычны вечар «Натхненне» з удзелам паэтаў Людмілы Вілюмы і Яўціхія Канаплёва.

Яўціхій Канаплёў - паэт, намінант літаратурнай прэміі «Паэт года-2013», член Рускай пісьменніцкай арганізацыі Латвіі і Расійскага саюза пісьменнікаў, а таксама Беларускага культурна-асветніцкага таварыства «Уздым», каардынатар Рускай пісьменніцкай арганізацыі Даўгаўпілса, аўтар некалькіх зборнікаў вершаў.

Людміла Вілюма - паэтка і выдатная выканаўца ўласных песень, намінант літаратурнай прэміі «Паэт года-2013», член Рускай пісьменніцкай арганізацыі Латвіі і Беларускага культурна-асветніцкага таварыства «Уздым», аўтар некалькіх зборнікаў вершаў.

Дуэт радуе і натхняе сваёй творчасцю жыхароў горада, а іх сумесныя музычна-паэтычныя вечары рэгулярна праходзяць у Цэнтры беларускай культуры і дзённым цэнтры «Саскарсме».

Метадыст ЦБК Марыя Памецька, адкрываючы мерапрыемства, адзначыла беларускую народную традыцыю «Піліпаўскіх вячорак», якія пачыналіся з надыходам перыяду посту перад Калядамі. Доўгімі зімнімі вечарамі дзяўчаты збіраліся невялічкімі групкамі па чарзе ў доме адна адной: пралі, вязалі, спявалі песні і размаўлялі. Абавязковым элементам «вячорак» быў прыход хлопцаў. Нягледзячы на ​​пост, пад канец вечара моладзь танцавала, гуляла ў розныя гульні. Традыцыі "Піліпаўскіх вячорак" знайшлі адлюстраванне і ў творчым вечары "Натхненне". У ціхі перадкалядны вечар гучала шмат вершаў і песень, віншаванняў і абмеркаванняў, і нават быў танец у выкананні галоўных віноўнікаў урачыстасці.

Кіраўніца ЦБК Жана Раманоўская, вітаючы творчы сямейны дуэт Л.Вілюмы і Я. Канаплёва, адзначыла іх несумненны талент, мэтанакіраванасць і бясконцую энергію, а таксама выказала надзею на далейшае супрацоўніцтва.

Вечар пачаўся і закончыўся музычным выступленнем харавой капэлы ЦБК «Спадчына» (мастацкі кіраўнік Яніна Юзэфовіч). Варта адзначыць, што ў канцы вечара імі як раз у тэму калядных вячорак была выканана песня «Святы вечар».

Вершы і песні, як у калейдаскопе, па чарзе змянялі адзін аднаго. Цёплыя падзячныя словы і вершы для сямейнага паэтычнага дуэта прагучалі ад Ірыны Страздоніка-Плячко, Валянціны Пруднікавай, Паўла Плотнікава, Настассі Сазанковой, Зянона Ваяводскага, Фаіны Осінай, Рэгіны Усачовай, Яўгена Ветлава, Кацярыны Андрэевай, Уладзіміра Врэтаса, Мікалая Навуменкі, Маргарыты Лабанарскай, Людмілы Ідзанэ, Яўгеніі Станкевіч, а таксама ад членаў праўлення «Уздыма» Вольгі Паўловіч і Зінаіды Сіліні, члена «Уздыма» і даўняга сябра беларусаў Валянціны Абушкевіч. Асобнымі блокамі прагучалі песні ў выкананні бардаў Анатоля Галера і Віталя Міхайлоўскага.          

Філасофскія вершы, вершы-разважанні пра ролю паэта і паэзіі ў жыцці грамадства, любоўная і пейзажная лірыка, вершы, напоўненыя тонкім гумарам і крышачку сарказмам - вось толькі невялікі пералік тэм з таго, што з велізарным натхненнем і душэўным цяплом прачыталі і праспявалі для сваіх шматлікіх калег і сяброў Л.Вілюма і Я.Канаплёў.

Музычна-паэтычны вечар «Натхненне» цалкам апраўдаў сваю назву і прайшоў у атмасферы гармоніі і натхнення, падарыўшы гледачам добры настрой і шмат станоўчых эмоцый.

Інфармацыя падрыхтавана:
Цэнтр беларускай культуры