Гучалі новыя вершы Паўла Плотнікава аб берагах жыцця

9 красавіка 2025 года ў Цэнтры беларускай культуры Дома адзінства (ЦБК) адбылася літаратурна-музычная вечарына “Берагі” паэта Паўла Плотнікава.

Вядомы ў Латгаліі паэт, аўтар васьмі паэтычных зборнікаў, Павел Плотнікаў на працягу многіх гадоў цесна супрацоўнічае з Цэнтрам беларускай культуры. Тут неаднаразова праходзілі яго творчыя вечарыны і прэзентацыі новых зборнікаў.

Паэзія П. Плотнікава шматгранная і актуальная, заўсёды знаходзіць водгук у сэрцах чытачоў. Яго вершы рэгулярна публікуюцца ў паэтычных зборніках розных літаратурных аб'яднанняў, членам якіх ён з'яўляецца.

П. Плотнікаў мала расказваў пра сваю біяграфію, але затое ўвесь вечар чытаў свае вершы – пранікліва, душэўна, вобразна. Абыякавых у зале не было, кожнага слухача выступленне паэта закранула за жывое.

З творчым вечарам Паўла Плотнікава цёпла павіншавалі яго калегі і сябры, даўгаўпілскія паэты Валянціна Пруднікава, Фаіна Осіна, Яўген Голубеў, Галіна Іванова, Таццяна Аляксеева, Анатоль Бойка, Валерый Мустэрман, Святлана Лапанэ і інш. А Станіслаў Валодзька нават прысвяціў паэту свой верш і сяброўскі паэтычны шарж.

Кіраўніца ЦБК Жанна Раманоўская прывітала паэта традыцыйнай афішай і кветкамі, атрымаўшы ў знак падзякі паэтычны зборнік Рэзэкненскага краю “Вуліца мрояў”, які толькі што выйшаў з друку.

Музычным падарункам сталі песні ў выкананні ансамбля “Купалінка”, у якім некалі спяваў П. Плотнікаў, і барда Анатоля Галера, які выканаў некалькі песень уласнага сачынення.

Шматлікія слухачы і знатакі творчасці прычалілі да берагоў паэтычнай ракі Паўла Плотнікава з вялікім багажом пазітыўных эмоцый і цудоўнага настрою.

Інфармацыя падрыхтавана:

Марыя Памецька,

метадыст Цэнтра беларускай культуры

т.: +371 65424695, 29811969

эл. пошта: Гэты адрас электроннай пошты абаронены ад спам-ботаў. У вас павінен быць уключаны JavaScript для прагляду.