3 чэрвеня 2022 года ў Даўгаўпілскім Цэнтры беларускай культуры (ЦБК) адбылася творчая майстэрня з удзельнікамі дзіцяча-юнацкага лагера Даўгаўпілскай сярэдняй школы №16. Творчую майстэрню арганізавалі і правялі кіраўніца Цэнтра беларускай культуры Жанна Раманоўская і метадыст Цэнтра беларускай культуры Марыя Памецька.
Дапытлівыя вучні пачатковых класаў, якія з вялікай стараннасцю вывучаюць свой родны горад і летам, пазнаёміліся з беларускімі традыцыямі і навучыліся вітацца і дзякаваць па-беларуску. Для многіх дзяцей гэта была першая сустрэча з беларускай культурай. Творчая майстэрня пачалася з сустрэчы з яркімі веснікамі лета – матылькамі. Матылькі былі зроблены ў традыцыйнай беларускай народнай тэхніцы выразання з паперы – “віцінанка”. Кожны ўклеіў свайго матылька ў часопіс “Tavi draugi” і старанна напісаў сваё імя побач з матыльком, каб матылі-гарэзы не адляталі ад сваіх новых гаспадароў.
У працяг творчай майстэрні дзеці пачалі размалёўваць сваё лета. На першай старонцы часопіса іх сустрэла залітая сонцам ілюстрацыя, на якой намаляваны галоўныя героі часопіса “Приветик!” – балотная чарапаха Мацільда, кацяня Барсік і кажан Лаўра. На гэты раз сябры атрымліваюць асалоду ад вясёлкі пасля сенакосу. Дзеці дзяліліся сваімі ўражаннямі аб жыцці ў вёсцы і паўтарылі, як правільна размаляваць вясёлку. Падчас работы дзетвара дапамагала адзін аднаму, дзялілася фламастарамі і алоўкамі, выкарыстоўваючы пры гэтым толькі што вывучаныя словы ветлівасці на беларускай мове – “калі ласка” і “дзякуй”. А таксама дзеці слухалі вясёлыя беларускія народныя песні.
Пасля размалёўвання прыйшоў час парухацца і пагуляць у беларускую народную гульню “Падушачка”. Трымаючыся за рукі і напяваючы песню, дзеці вадзілі карагод вакол аднаго з дзяцей, які стаяў у цэнтры круга са стракатай падушачкай. Пасля праспяванага куплета ён выбіраў свайго лепшага сябра, абдымаў яго і дарыў яму падушачку. Дзяўчынкі адорвалі хлопчыкаў і наадварот. Дзеці палюбілі новую гульню і абяцалі гуляць у яе ў лагеры.
Творчая майстэрня завяршылася фотасесіяй з магчымасцю для прыгожых дзяўчынак і самых смелых хлопчыкаў прымерыць на сябе ролю беларускай прыгажуні ў васільковым полі. А таксама дзеці наведалі музейны пакой “Беларуская хатка”, дзе пазнаёміліся з прадметамі беларускага побыту.
Удзельнікі дзіцячага лагера былі ў захапленні ад атрыманага падарунка ад ЦБК – салодкага сувеніра і часопіса “Tavi draugi” з прыгожымі ілюстрацыямі, якія дзеці змогуць размалёўваць усё лета!
Інфармацыя падрыхтавана:
Аніта Кардэле,
арганізатар культурных мерапрыемстваў Цэнтра беларускай культуры
