4 кастрычніка 2019 года ў Даўгаўпілсе пройдзе IX Міжнародны фестываль народнай культуры “Беларускі кірмаш у Даўгаўпілсе”, у якім прымуць удзел беларускія творчыя калектывы і ўдзельнікі з Латвіі, Літвы, Эстоніі і Беларусі. Традыцыйны восеньскі фестываль арганізоўвае і праводзіць Даўгаўпілскі Цэнтр беларускай культуры (ЦБК), які адзначыў у гэтым годзе сваё 20-годдзе.
Па традыцыі Міжнародны фестываль народнай культуры “Беларускі кірмаш у Даўгаўпілсе” праходзіць штогод восенню, калі сабраны ўраджай і паўсюдна праводзяцца кірмашы.
У пятніцу, 4 кастрычніка, 17.00 у фае Палаца культуры разгорнецца традыцыйная рамесная выстава. Майстры з Беларусі будуць рэкламаваць вырабы дэкаратыўна-прыкладнога мастацтва і навучаць іх вырабляць. Дабрачынная кніжная акцыя запрашае абмяняць прынесеную кнігу на беларускай мове ці пра Беларусь на фірмовы фестывальны сувенір “Гузік шчасця”. Для аматараў патанцаваць у фае другога паверха будзе праводзіцца майстар-клас па беларускіх народных танцах.
У 18.00 у вялікай канцэртнай зале Палаца культуры пачнецца Гала-канцэрт “Вясёлы панадворак”. Яркае тэатралізавана-музычнае прадстаўленне адкрыюць аматарскія калектывы Даўгаўпілскага Цэнтра беларускай культуры: ансамбль беларускай народнай песні “Купалінка”, танцавальны ансамбль “Лянок”, вакальны ансамбль “Пралескі”, харавая капэла “Спадчына”, тэатральная студыя “Паўлінка”, дзіцячая студыя “Скарбніца” .
У госці на фестываль у Даўгаўпілс прыедуць творчыя беларускія калектывы і салісты з Латвіі, Літвы, Эстоніі. А артысты з Беларусі, несумненна, унясуць новыя і яркія фарбы ў рознакаляровы фестывальны вянок.
Сардэчна запрашаем на IX Міжнародны фестываль народнай культуры “Беларускі кірмаш у Даўгаўпілсе”, які адбудзецца ў пятніцу, 4 кастрычніка, у 18.00, у Палацы культуры (вул.Смілшу, 92)!
На мерапрыемствах вядзецца фота і відэаздыманне.
Уваход свабодны.
Інфармацыя падрыхтавана:
Цэнтр беларускай культуры,
Марыя Памецька, метадыст ЦБК,
т. 654 24695, 29811969, Гэты адрас электроннай пошты абаронены ад спам-ботаў. У вас павінен быць уключаны JavaScript для прагляду.
г.Даўгаўпілс, вул.Алеяс, 68-1A
