2 кастрычніка 2022 года ў Крустпілскім Доме культуры адбыўся фестываль “Бульба”, арганізаваны Екабпілскім беларускім таварыствам “Спатканне”. Па традыцыі свята падтрымалі творчыя калектывы Даўгаўпілскага Цэнтра беларускай культуры (ЦБК) – танцавальны ансамбль “Лянок” і харавая капэла “Спадчына”.
У беларусаў Даўгаўпілса і Екабпілса даўно склаліся сяброўскія і партнёрскія адносіны. Нашы аматарскія калектывы – частыя госці на мерапрыемствах у екабпілскіх беларусаў: то дэманструюць нацыянальныя касцюмы, то праводзяць дэгустацыю нацыянальных страў, то зазываюць вясну.
Ну і, вядома ж, ніводнае Свята бульбы не абыходзіцца без удзелу даўгаўпілскіх беларусаў. Вось і на гэты раз прадстаўнічая дэлегацыя Цэнтра беларускай культуры і беларускага таварыства “Уздым” пабывала ў Екабпілсе, каб песнямі, танцамі, фірменнымі сувенірамі і цёплымі словамі павіншаваць сваіх екабпілскіх сяброў.
Здаецца, што пра бульбу ўжо прачытана і сказана ўсё, але… Нягледзячы на тое, што свята стала традыцыйным, кожны раз яго ўдзельнікі і госці даведваюцца нешта новае пра гэтую дзіўную гародніну, якая так упадабала беларусаў і іх суседзяў. І ўслаўлялі бульбу не толькі тэматычнымі песнямі, вершамі, танцамі, але і кулінарнымі вынаходствамі. Абавязковы элемент свята – простыя, сытныя і вельмі смачныя стравы з бульбы, дэгустацыя якіх прайшла пасля канцэрта.
Супрацоўніцтва ў святах, песнях і кухні працягваецца.
Інфармацыя падрыхтавана:
Марыя Памецька,
метадыст Цэнтра беларускай культуры
