7 жніўня 2025 года ў пасёлку Малінава Аўгшдаўгаўскага краю адбылася прэзентацыя дзвюх факсімільных кніг Сяргея Пятровіча Сахарава, прысвечаных гісторыі праваслаўя ў Латвіі. Кнігі выдадзены Даўгаўпілскім беларускім таварыствам “Альтанка”. Праект падтрымаў Цэнтр беларускай культуры Дома адзінства і яго харавая капэла “Спадчына”.
С.П. Сахараў (1880-1954) – гісторык праваслаўнай царквы, беларускі фалькларыст, этнограф, педагог, публіцыст, грамадска-палітычны дзеяч Латвійскай Рэспублікі. Пасля сябе ён пакінуў сабраную ў экспедыцыях унікальную калекцыю фальклору мясцовых беларусаў і дзве кнігі даследаванняў па гісторыі праваслаўя ў Латвіі. Сахарава нават называлі беларускім Нестарам Летапісцам.
Даўгаўпілскае беларускае таварыства “Альтанка” выпусціла факсімільныя выданні дзвюх рэдкіх кніг Сяргея Пятровіча Сахарава, якія выйшлі ў свет у міжваенны перыяд у Латвіі. Кніга “Праваслаўныя цэрквы ў Латгаліі” (1939 год выдання, Рыга) была перавыдадзена ў 2024 годзе, а кніга “Рыжскія праваслаўныя архіпастыры за сто гадоў (1836-1936). Да гісторыі праваслаўя ў Латвіі і Эстоніі” (1937 год выдання, Даўгаўпілс) – у 2025 годзе. Свой праект “Альтанка” прысвяціла 145-годдзю Сяргея Сахарава. Большая частка тыражоў абедзвюх кніг перададзена ў дар Латвійскай праваслаўнай царкве.
Пра гэта каманда праекта расказала жыхарам Малінаўскай воласці. Асаблівая ўвага была нададзена гісторыі мясцовай царквы – праваслаўнага храма ў гонар прарока Божага Іллі.
Мерапрыемства музычна ўпрыгожыла харавая капэла “Спадчына” (мастацкі кіраўнік Сяргей Братусеў), выканаўшы некалькі духоўных песень на беларускай і латышскай мовах.
Супрацоўніца Малінаўскай воласці Элвіра Кокіна, арганізатар мерапрыемства, падзякавала гасцям за пазнавальную і цікавую сустрэчу.
Затым усе жадаючыя прайшлі ў царкву Іллі Прарока, аднаўленне якой працягваецца. Прыхаджанін і вядомы спявак Сяргей Піманаў акапэльна выканаў рэлігійную песню.
Праект Даўгаўпілскага беларускага таварыства “Альтанка” па факсімільным выданні кнігі С.П. Сахарава “Рыжскія праваслаўныя архіпастыры за сто гадоў (1836-1936). Да гісторыі праваслаўя ў Латвіі і Эстоніі” (ISBN 978-9934-9339-0-5) атрымаў суфінансаванне Фонду падтрымкі НДА Даўгаўпілскага дзяржаўнага гарадскога самакіравання.
https://bkc.daugavpils.lv/be/home/11-newsru/788-malinovas-iedz-votaji-iepaz-stas-ar-s-saharova-gramatam?print=1&tmpl=component#sigProId91c694e9a4
Інфармацыя падрыхтавана:
Жанна Раманоўская,
старшыня Даўгаўпілскага беларускага таварыства “Альтанка”,
Гэты адрас электроннай пошты абаронены ад спам-ботаў. У вас павінен быць уключаны JavaScript для прагляду.