Фестывальны канцэрт паказаў суквецце культур Даўгаўпілса на 10 мовах

21 лютага 2025 года ў канцэртнай зале Дома адзінства адбыўся ІІІ-ці фестываль “Суквецце культур”, арганізаваны Цэнтрам беларускай культуры Дома адзінства ў супрацоўніцтве з Даўгаўпілскім беларускім таварыствам “Альтанка”. На гэты раз канцэрт быў прысвечаны Міжнароднаму дню роднай мовы.

Родная мова – гэта хлеб нацыі, душа народа, народная спадчына. Гэтая думка чырвонай ніткай прайшла праз увесь маляўнічы канцэрт, які прадставіў нацыянальна-культурную разнастайнасць Даўгаўпілса.

У канцэрце прынялі ўдзел творчыя калектывы Цэнтра беларускай культуры: ансамбль беларускай народнай песні “Купалінка”, танцавальны ансамбль “Лянок”, вакальны ансамбль “Пралескі”, харавая капэла “Спадчына”, дзіцячая студыя “Скарбніца”, тэатральная студыя “Паўлінка”.

Выступленні ансамбляў беларускай культуры чаргаваліся з калектывамі, салістамі і чытальнікамі, якія прадстаўлялі рускую, польскую, украінскую, яўрэйскую, літоўскую, нямецкую культуры Даўгаўпілса: маладзёжны танцавальны ансамбль “Узоры” (Цэнтр рускай культуры); танцавальны ансамбль “Кукулечка” (Цэнтр польскай культуры); салісты Руслан Абасаў і Віктар Хамяк (Цэнтр украінскай культуры); вакальны ансамбль “Mazl tov”, танцавальны ансамбль “Aviva” і саліст Яніс Раснач (яўрэйская абшчына); фальклорны ансамбль “Rasa” (літоўскае таварыства “Rasa”); Вера Косціна (нямецкае таварыства “Erfolg”); Станіслаў Валодзька (Таварыства латвійска-беларускай садружнасці).

У багатую моўную палітру канцэрта, на якім прагучала дзесяць моў, свае фарбы ўнеслі аматарскія ансамблі з Латгаліі: славянскі ансамбль “Узоры” (Ліваны), жаночы вакальны ансамбль “Рабінушка” (Прэйлі), ансамбль беларускай песні “Сузор'е” (Рэзэкнэ).

Канцэрт “Суквецце культур” праходзіць ужо трэці год запар, а сёлета набыў статус міжнароднага дзякуючы ўдзелу барда Сяргея Шарамета (Вільнюс, Літва).

Свята “Суквецце культур” прадэманстравала, якім неацэнным скарбам валодае Даўгаўпілс, жыхары якога гавораць на многіх мовах і аб'ядноўваюцца праз песню – універсальную мову садружнасці і ўзаемаразумення.

Інфармацыя падрыхтавана:

Марыя Памецька,

метадыст Цэнтра беларускай культуры

т.: +371 65424695, 29811969

эл. пошта: marija.pometjko@inbox.lv