7 верасня 2019 года ў Доме Адзінства прайшоў святочны канцэрт Дзён беларускай культуры ў Латвіі, які адкрыў новы творчы сезон Цэнтра беларускай культуры і Беларускага культурна-асветніцкага таварыства «Уздым» у Даўгаўпілсе.
https://bkc.daugavpils.lv/be/home/11-newsru/321-novy-sezon-adkryli-dni-belaruskaj-kultury-kantsert-i-vystavy?print=1&tmpl=component#sigProIdcc3789bf0f
Дні беларускай культуры ў Латвіі праходзяць штогод увосень пад эгідай Саюза беларусаў Латвіі ва ўсіх гарадах краіны, дзе актыўна працуюць беларускія дыяспары. У гэтым годзе Дні беларускай культуры прысвечаны стагоддзю беларускай нацыянальнай дзяржаўнасці.
Святочны канцэрт адкрылі кіраўніца Цэнтра беларускай культуры і беларускага таварыства «Уздым» Жанна Раманоўская і член праўлення Саюза беларусаў Латвіі Валерый Амбросаў, якія павіншавалі ўдзельнікаў творчых калектываў і гледачоў з Днямі беларускай культуры ў Латвіі, з новым творчым сезонам.
Генеральны консул Рэспублікі Беларусь у Даўгаўпілсе Уладзімір Клімаў у вітальнай прамове адзначыў важнасць традыцый і значэнне Дзён беларускай культуры ў жыцці беларускай дыяспары ў Латвіі.
Паэт Станіслаў Валодзька прачытаў свой верш, які напісаў да стагоддзя беларускай нацыянальнай дзяржаўнасці.
Канцэртную праграму пачалі мясцовыя беларускія калектывы – ансамбль беларускай народнай песні «Купалінка», танцавальны ансамбль «Лянок», вакальна-інструментальны ансамбль «Пралескі», харавая капэла «Спадчына», дзіцячая студыя «Скарбніца». Паэтка Лілія Воранава прачытала свае вершы, прысвечаныя малой радзіме.
Эстафету ў даўгаўпілчан пераняў ансамбль «Завіруха» Екабпілскага беларускага таварыства «Спатканне», выканаўшы душэўныя беларускія песні.
Завяршыла канцэрт яркае выступленне народнага ансамбля «На панадворку» з Браслава.
У фае гледачы таксама маглі азнаёміцца з экспазіцыямі: перасовачнай літаратурнай выставай пра творчасць Пімена Панчанкі з фондаў Дзяржаўнага музея гісторыі беларускай літаратуры; дзіцячымі малюнкамі конкурсу «Мая Беларусь», выставай дэкаратыўна-прыкладной творчасці рамесніц Ларысы Дарафейчык і Ірыны Высоцкай (г.Браслаў).
Арганізатары свята – Даўгаўпілскі Цэнтр беларускай культуры ў супрацоўніцтве з Беларускім культурна-асветніцкім таварыствам «Уздым», дзякуюць за інфармацыйную падтрымку радыёстанцыю «Алисе +», газеты «Миллион» і «Латгалес лайкс», парталы: gorod.lv, grani.lv, nasha.lv, D-fakti.lv.
Інфармацыя падрыхтавана:
Цэнтр беларускай культуры