“Паўлінка” выступіла на свяце беларускай песні ў Літве

4 кастрычніка 2025 года ў г. Вісагінас (Літва) пры поўным аншлагу прайшло XXIX “Свята беларускай песні”, на якім выступіла тэатральная студыя “Паўлінка” Цэнтра беларускай культуры (ЦБК) Дома адзінства г. Даўгаўпілса.

Фестываль беларускай песні ў Літве праходзіць штогод восенню, мяняючы гарады. Традыцыйна яго арганізуе Згуртаванне беларускіх грамадскіх арганізацый Літвы. Мэта свята – папулярызацыя беларускай нацыянальнай культуры ў дыялогу з літоўскай культурай, а таксама з культурамі іншых нацыянальных меншасцей, якія жывуць у Літве. Аблюбаваным месцам фестывалю з'яўляецца Вісагінас, у якім шмат гадоў працуе ансамбль беларускай песні “Світанак” пад кіраўніцтвам Сяргея Шабадалава, нязменнага вядучага свята.

На XXIX “Свяце беларускай песні” у Вісагінасе выступілі аматарскія беларускія ансамблі з Вісагінаса, Клайпеды, Шальчынінкая, аўтары з Вільнюса, а таксама госці з Латвіі – ансамбль “Таўтыбу студыя” (Эзэрніекі), “Аколіца” (Дагда), “Накцюрн” (Краслава), паэт Станіслаў Валодзька і тэатральная студыя “Паўлінка»” (Даўгаўпілс).

Тэатральная студыя “Паўлінка” (рэжысёр Інэса Казлоўская) прадставіла гледачам мініяцюру пра збор пасагу для нявесты, з якой выступала на Міжнародным фальклорным фестывалі “Baltica 2025”.

Цэнтр беларускай культуры г. Даўгаўпілса шмат гадоў плённа супрацоўнічае з ансамблем “Світанак” з Вісагінаса. Чарговая сустрэча адбудзецца праз тыдзень ужо на Міжнародным фестывалі народнай культуры “Беларускі кірмаш у Даўгаўпілсе”.

Інфармацыя падрыхтавана:

Тэкст і фота Жанны Раманоўскай,

кіраўніцы Цэнтра беларускай культуры,

Гэты адрас электроннай пошты абаронены ад спам-ботаў. У вас павінен быць уключаны JavaScript для прагляду., т. 20374840