Фестываль “Беларускі кірмаш” стартаваў выставай карцін Вэлты Лоцэ

9 кастрычніка 2025 года ў Цэнтры беларускай культуры Дома адзінства (ЦБК) адкрылася персанальная выстава карцін “Ля мальберта” Вэлты Лоцэ, прымеркаваная да 15-годдзя творчай дзейнасці мастачкі.

Адкрыццё выставы карцін адбылося ў рамках XV Міжнароднага фестывалю народнай культуры “Беларускі кірмаш у Даўгаўпілсе”. І гэта не простае супадзенне, паколькі першы публічны паказ мастачкі Вэлты Лоцэ шырокай аўдыторыі адбыўся ў Цэнтры беларускай культуры 15 гадоў таму, у той жа год, калі зарадзіўся фестываль “Беларускі кірмаш”.

Адкрываючы выставу, кіраўніца ЦБК Жанна Раманоўская адзначыла: “15 гадоў святкуе “Беларускі кірмаш у Даўгаўпілсе” і столькі ж гадоў піша карціны мастачка з беларускімі каранямі Вэлта Лоцэ. Увесь гэты час плённае супрацоўніцтва ЦБК і мастачкі развівалася і ўмацоўвалася. Персанальныя і зборныя выставы з удзелам В. Лоцэ неаднаразова праводзіліся ў Цэнтры беларускай культуры, і адна яе карціна прысвечана фестывалю “Беларускі кірмаш у Даўгаўпілсе””.

Вэлта Лоцэ – таленавітая творчая асоба: на адкрыцці сваёй персанальнай выставы выступала ў ролі канферансье, чытала вершы і сольна выконвала песні. Харавая капэла “Спадчына”, у якой спявае В. Лоцэ, падарыла некалькі беларускіх аўтарскіх песень; вершамі і цёплымі словамі павіншавалі сябры і шматлікія наведвальнікі.

У творчым партфоліо мастачкі каля паўсотні персанальных і зборных выставак. На юбілейнай выставе, якая адкрылася ў ЦБК, прадстаўлена больш за 30 выдатных пейзажаў і нацюрмортаў. Напісаныя таленавітай рукой майстра, працы захапляюць сваёй непаўторнасцю, дасканаласцю і прыгажосцю, ігрой адценняў і фарбаў.

Наведаць юбілейную выставу Вэлты Лоцэ магчыма да 31 снежня 2025 года па адрасе: ЦБК, вул. Алеяс, 68-1А, Даўгаўпілс.

Інфармацыя падрыхтавана:

Марыя Памецька,

метадыст Цэнтра беларускай культуры

т.: +371 65424695, 29811969

эл. пошта: Гэты адрас электроннай пошты абаронены ад спам-ботаў. У вас павінен быць уключаны JavaScript для прагляду.