Дні беларускай культуры ў Даўгаўпілсе адкрыліся выставай з Мінска

21 мая 2022 года фотавыставай “Беларусь: цудоўныя імгненні” адкрыліся Дні беларускай культуры ў Даўгаўпілсе, якія традыцыйна ў маі арганізуе Цэнтр беларускай культуры Даўгаўпілскага гарадскога самакіравання. Экспазіцыя прадстаўлена Нацыянальнай бібліятэкай Беларусі і будзе адкрыта ўсё лета.

Дні беларускай культуры стартавалі 21 мая. Гэта дата адзначана ў календары Арганізацыі Аб'яднаных Нацый як Сусветны дзень культурнай разнастайнасці ў імя дыялогу і развіцця. У гэты дзень звяртаюць увагу не толькі на багацце культур свету, але і на важнасць міжкультурнага дыялогу. Пра гэта гаварыла на ўрачыстасці адкрыцця фотавыставы кіраўніца Цэнтра беларускай культуры Жанна Раманоўская, падкрэсліўшы: “Мы ў гэтым свеце – розныя, і нашы культуры – розныя. Я перакананая — толькі прызнанне і прыняцце культурнай разнастайнасці, бесперапынны міжкультурны дыялог у наш вельмі няпросты час садзейнічаюць цывілізаванаму шляху развіцця, стабільнасці, узаемапавазе і ўзаемаразуменню. Трэба будаваць масты».

На выстаўцы “Беларусь: цудоўныя імгненні” прадстаўлены маляўнічыя фатаграфіі аб'ектаў сакральнай архітэктуры, прыгожых ландшафтаў у розныя поры года, прыродных сімвалаў Беларусі, дзяцей, якія ўсміхаюцца. Аўтары здымкаў – вядомыя беларускія фатографы: Ігар Бышнёў, Максім Вейзэ, Юлія Войніч, Кацярына Міціна, Сяргей Плыткевіч, Улад Сакалоўскі, Сяргей Тарасаў.

Выстаўка адлюстроўвае ўнікальную прыгажосць беларускай прыроды і культуры, знаёміць з Беларуссю: панарамныя віды з вышыні птушынага палёту, бязмежныя абшары палёў і лясоў, жывапісныя краявіды рэк і азёр, шчаслівыя дзіцячыя ўсмешкі. Сімвалічнымі для краіны з'яўляюцца зубр і бусел, васілёк, лён, канюшына, і яны таксама адлюстраваны ў нечаканых кадрах фотамастакоў. Аб гэтым гаварыў у сваім выступленні Генеральны консул Рэспублікі Беларусь у Даўгаўпілсе Ілья Лапуць, запрасіўшы гледачоў адкрыць для сябе Беларусь – незнаёмую, яркую, добразычлівую.

Экспазіцыю ЦБК прадставіла Нацыянальная бібліятэка Беларусі (НББ). Атрымаўся такі культурны абмен: у лістападзе фотавыстава “Беларускі погляд Даўгаўпілса” Эдуарда Літвіноўскага выстаўлялася ў НББ у Мінску, а ў маі фотавыстава “Беларусь: выдатныя імгненні” з Мінска пачынае падарожжа па Латвіі. Выстаўка будзе даступная ў Даўгаўпілсе да 31 жніўня, а затым адправіцца ў Ліепаю – будучую культурную сталіцу Еўропы-2027, дзе будзе выстаўлена ў Беларускім доме “Мара”.

Фотавыстава “Беларусь: цудоўныя імгненні” у Даўгаўпілсе арганізавана Цэнтрам беларускай культуры ў супрацоўніцтве з Нацыянальнай бібліятэкай Беларусі і Генеральным консульствам Рэспублікі Беларусь у Даўгаўпілсе.

Дні беларускай культуры працягнуцца творчымі сустрэчамі з паэтамі, выставай карцін, канцэртам і іншымі мерапрыемствамі.

Прэс-рэліз Цэнтра беларускай культуры