17 снежня 2021 года ў Даўгаўпілсе можна было сустрэць беларускага Дзеда Мароза і яго ўнучку Снягурачку. Яны размаўлялі з маленькімі гараджанамі і іх бацькамі, а таксама абменьвалі салодкі пернік-ялінку на дзіцячыя самаробныя паштоўкі з пажаданнямі Даўгаўпілсу.
https://bkc.daugavpils.lv/be/11-newsru/504-u-da-ga-pilse-belaruski-dzed-maroz-myanya-perniki-na-pashto-ki?print=1&tmpl=component#sigProIdc427e32849
Калядны час ужо наступіў: на галоўнай плошчы яркімі агнямі зіхаціць ёлка, чароўныя моманты і час цудаў накрываюць горад, паўсюль чутны дзіцячы радасны смех. Менавіта таму ў пачатку снежня даўгаўпілскі Цэнтр беларускай культуры (ЦБК) анансаваў творчую калядную акцыю “Я жадаю Даўгаўпілсу…”. Паўдзельнічаць у каляднай акцыі мог кожны ахвотнік, бо арганізатары не ставілі ўзроставых рамак.
Так, у пятніцу пад упрыгожанай аркай на скрыжаванні вуліц Алеяс і пешаходнай Рыгас у 16 гадзін, калі запальваецца святочная ілюмінацыя, на сустрэчу з беларускімі казачнымі персанажамі сабраліся дзеці з бацькамі, бабулямі. Павольным раўчуком (з захаваннем сацыяльнай дыстанцыі!) яны рухаліся да герояў, перадавалі ўласнаручна зробленыя паштоўкі з пажаданнямі, наўзамен атрымлівалі салодкі пернік у выглядзе галоўнага сімвала Новага года – ялінкі, і фатаграфаваліся на памяць. Нехта расказваў верш, самыя дапытлівыя задавалі пытанні.
Як адзначыла кіраўніца Цэнтра беларускай культуры Жанна Раманоўская, “…ідэя ЦБК была адрасаваная сем'ям. Дарослыя адарваліся ад сацыяльных сетак і zoom-аў, правялі час у сумеснай творчасці са сваімі дзецьмі. Усёй сям'ёй атрымлівалі салодкія падарункі і фатаграфаваліся, а потым са святочным настроем адпраўляліся па ўпрыгожанай вуліцы Рыгас да галоўнай гарадской ёлкі на плошчы Віенібас. Мы прасілі ў паштоўках пажадаць што-небудзь Даўгаўпілсу. І атрымалі шмат добрых і шчырых пажаданняў. Асабліва кранальна было чытаць напісаныя дзіцячай рукой радкі, каб хутчэй скончылася пандэміі і ў школах адмянілі маскі”.
Дзед Мароз і Снягурачка падчас акцыі сабралі 84 віншавальныя паштоўкі, розных колераў і памераў, выкананыя ў розных тэхніках, з пажаданнямі Даўгаўпілсу на трох мовах – рускай, латышскай і беларускай. А жадалі дзеці свайму роднаму гораду ўсяго самага добрага, напрыклад:
“Я желаю Даугавпилсу больше добрых жителей, которые будут о нем заботиться. Пусть он процветает и развивается, и становится только лучше!”
“Lai Daugavpils māju logos vienmēr spīd gaisma un ielas pilnas ar laimīgiem cilvēkiem! Skaistumu un mājīgumu mūsu mīļajai Daugavpilij!”
“Жадаю Даўгаўпілсу цеплыні, згоды, развіцця і стаць культурнай сталіцай Еўропы 2027, тым чынам шмат-шмат грошыкаў!”.
Усе пажаданні каляднай акцыі Цэнтра беларускай культуры будуць апрацаваны і размешчаны ў інтэрнеце, а падораныя святочныя паштоўкі ўпрыгожаць офіс установы.
Інфармацыя падрыхтавана:
Цэнтр беларускай культуры