У сераду, 22 верасня 2021 года, у Даўгаўпілскім Цэнтры беларускай культуры (ЦБК) у рамках XI Міжнароднага фестывалю народнай культуры “Беларускі кірмаш у Даўгаўпілсе” адбылася доўгачаканая прэзентацыя кулінарнай кнігі “Кірмашоўскія прысмакі”, прычым з дэгустацыяй.
https://bkc.daugavpils.lv/be/11-newsru/486-tretsi-dzen-belaruskaga-kirmashu-zakryla-degustatsyya-natsyyanalnaj-kukhni?print=1&tmpl=component#sigProId1ff62260d3
Беларусы славяцца сваёй гасціннасцю, таму на “Беларускім кірмашы” гасцей заўсёды частуюць традыцыйнымі стравамі нацыянальнай кухні. Так званы “кірмашовы тыдзень” быў багаты на разнапланавыя мерапрыемствы і сустрэчы. Але асаблівую, “смачную” нотку прыўнесла прэзентацыя кулінарнай кнігі “Кірмашоўскія прысмакі”, якая прайшла ў фармаце дэгустацыі. Умелыя беларускія гаспадынькі прадставілі стравы, з якімі дэбютавалі ў зборніку рэцэптаў сельскай беларускай кухні, выдадзенай ЦБК у 2020 годзе, калі працавалі дыстанцыйна.
Онлайн-прэзентацыя кнігі “Кірмашоўскія прысмакі” адбылася ў лютым гэтага года на Міжнароднай канферэнцыі “Беларускія чытанні ў Даўгаўпілсе”. Але “пасмакавать” многія з 34-х кулінарных шэдэўраў, прадстаўленых у кнізе, давялося толькі зараз. Ва ўсіх аўтараў прадстаўленых рэцэптаў беларускія карані, а апублікаваныя рэцэпты сабраны з усіх рэгіёнаў Беларусі. Незабыўны смак і водар з дзяцінства, настальгічныя ўспаміны пра тое, як гатавалі ежу іх мамы і бабулі, яны з любоўю перанеслі на старонкі кнігі.
Як адзначыла кіраўніца ЦБК, ідэйны натхняльнік і рэдактар кнігі Жанна Раманоўская: “Зборнік “Кірмашоўскія прысмакі” не прэтэндуе на званне кулінарнага адкрыцця. Мы не ламаем стэрэатыпы пра беларусаў і верныя традыцыям: большасць страў рыхтуюць з бульбы. Паўсядзённыя харчовыя перавагі людзей адлюстроўваюць вядомыя дранікі, клёцкі, калдуны, бульбянікі, бульбяная каўбаса і бабка, а таксама малавядомыя кнышы, сашні, шышкі або сарока. Рэцэпты мясных і рыбных страў, супоў і салатаў, печыва і ласункаў дэманструюць разнастайнасць беларускай кухні”.
Беларуская кухня багатая традыцыямі, простая ў прыгатаванні і, што самае важнае – смачная, здаровая і сытная. У гэтым пераканаліся ўсе прысутнічаючыя на дэгустацыі госці. Ох, і нялёгка ім давялося – вочы разбягаліся ад багацця разнастайных маляўніча аформленых страў, а водары, што луналі ў паветры, заклікалі неадкладна пакаштаваць “смачнасці”. Кожная ўмеліцы натхнёна рэкламавала сваю страву, дзялілася сакрэтамі яе прыгатавання, а гасцінная “Гаспадыня” кулінарных вячорак (Марыя Памецька) частавала гасцей.
Да бульбяных страў у дадатак ішлі грыбочкі, ікра, блінцы, пірагі і піражкі з разнастайным начыннем, насычаны духмяны журавінавы кісель. Чаго каштавала адна толькі паляндвіца – так званы беларускі хамон, незабыўны смак з дзяцінства. Тут ужо якраз да часу прыйшліся “смачныя” радкі з твораў беларускіх класікаў, прыказкі і прымаўкі, якімі суправаджаецца кожная страва.
Зборнік маляўніча аформлены ў беларускім аўтэнтычным стылі, а большасць аўтараў рэцэптаў сфатаграфаваныя ў народных строях. Кожны ўдзельнік праекта атрымаў у падарунак ад ЦБК кулінарную кнігу, падзячную грамату і фестывальны сувенір.
Кніга ўжо “пайшла ў народ”, падораная партнёрам у Латвіі, Літве, Эстоніі, Беларусі. І ў планах ёсць задумка не спыняцца на дасягнутым, а захоўваць рэцэпты сваіх продкаў у іншых выданнях, каб этнічная ўнікальнасць беларусаў захоўвалася і жыла “у песнях, у святах і ў кухні”.
Інфармацыя падрыхтавана:
Цэнтр беларускай культуры,
метадыст ЦБК Марыя Памецька