У нядзелю, 15 снежня 2019 года, у канцэртнай зале Дома Адзінства вакальна-інструментальны ансамбль “Пралескі” Даўгаўпілскага Цэнтра беларускай культуры (ЦБК) падарыў гараджанам і гасцям горада маляўнічую святочную праграму “І зімой цвітуць пралескі”, прымеркаваную да свайго 5-гадовага юбілею.

Вакальна-інструментальны ансамбль “Пралескі” заснаваны ў Цэнтры беларускай культуры ў 2014 годзе. Як і першыя вясновыя блакітнавата-сінія кветкі, якія з'яўляюцца на вясновых праталінах пад першымі промнямі вясновага сонца, і якія далі такую сімвалічную назву калектыву з 6 самадзейных спявачак маладога ўзросту, так і “Пралескі” за невялікіх пяць гадоў раскрылі свае таленты і дасягнулі вельмі высокага выканальніцкага ўзроўню, заслужанай папулярнасці і любві гледачоў не толькі ў Даўгаўпілсе і Латвіі, а таксама ў Беларусі, Літве, Эстоніі.

Калектыў годна прадстаўляў ЦБК на Уселатвійскім свяце песні і танца, міжнародных фестывалях у Беларусі: “Славянскі базар у Віцебску”, “Браслаўскія зарніцы”, “Вянок дружбы” у Бабруйску, “Дняпроўскія галасы” у Дуброўне, “Ганненскі кірмаш” у Зэльве, “Жураўлі і журавіны Міёрскага краю”; а таксама “Песні памежжа” у Вільнюсе (Літва), “Вентспілскі вянок”, “Фэст” у Дагдзе, 1-м конкурсе беларускай песні ў Латвіі і многіх іншых.

Ганаровы госць вечара, консул Рэспублікі Беларусь у Даўгаўпілсе – Мікалай Раманкевіч, у сваім прывітальным слове павіншаваў “Пралесак” з юбілеем, адзначыў іх высокі ўзровень майстэрства і тое, што з'яўляецца даўнім прыхільнікам ансамбля, пажадаў заваявання новых творчых вяршыняў і ўручыў ганаровую грамату ад Генконсульства РБ у Даўгаўпілсе.

Кіраўніца ЦБК Жанна Раманоўская, якой, дарэчы, належыць ідэя стварэння маладога эстраднага калектыву, сардэчна павіншавала таленавітых дзяўчат кветкавымі кампазіцыямі, падзячнымі лістамі і сувенірамі, адзначыўшы, што Цэнтр беларускай культуры можа расці і развівацца толькі з моладдзю. Асаблівых слоў падзякі заслужана ўдастоіліся мастацкі кіраўнік ансамбля “Пралескі” Настасся Лукашонак і першы кіраўнік Настасся Малышава.
           Кошык кветак, нібы з добрай казкі, сабраных у зімовым лесе, падарыў “Пралескам” партнёр ЦБК – беларускае таварыства “Уздым”. Яго кіраўніцтва з гонарам адзначыла, што беларуская дыяспара ў Даўгаўпілсе не толькі шматлікая, але і таленавітая у самых розных напрамках, і сярод іх яркай юнай зорачкай ззяюць “Пралескі”.

Рэпертуар маладога калектыву вельмі багаты і разнастайны: гэта беларускія народныя песні, фальклорныя абрадавыя песні, сучасныя і аўтарскія песні на беларускай, латышскай, латгальскай, рускай мовах у суправаджэнні скрыпкі, акардэона і народных інструментаў (выкарыстоўваюцца таксама музычныя апрацоўкі і акапэльныя спевы).

Усю разнастайную музычную палітру змаглі ўбачыць, паслухаць і ацаніць даўгаўпілскія гледачы, якія практычна запоўнілі цалкам канцэртную залу Дома Адзінства нядзельным днём. Спявачкі ў блакітных касцюмах, сугучных назве, выканалі шмат лірычных, рамантычных, вясёлых і запальных песень пра каханне, прыроду, малую радзіму. Выкананне было настолькі пранікнёным і задушэўным, што многія песні выклікалі слёзы на вачах, захопленыя крыкі “Брава!” і бурныя апладысменты.

А паколькі “Пралескі” святкавалі свой першы юбілей, то ўсе аматарскія калектывы ЦБК: ансамбль народнай песні “Купалінка”, харавая капэла “Спадчына”, танцавальны ансамбль “Лянок”, дзіцячая студыя “Скарбніца”, павіншавалі песнямі, танцамі, вершамі, шчырымі словамі і крэатыўнымі падарункамі.

Вядучыя вечара Уладзімір Стасевіч і Марыя Памецька арганічна і артыстычна аб'ядноўвалі музычныя нумары і выступленні гасцей у адзін яркі, запамінальны канцэрт.

Публіка па заслугах ацаніла цікавую і захапляльную канцэртную праграму, дзякавала ЦБК за зладжаную арганізацыю мерапрыемства, за цудоўнае выкананне нашых маладых таленавітых артыстак, у якіх наперадзе новыя непакорныя вяршыні і дасягненні!
                   
Інфармацыя падрыхтавана:
Цэнтр беларускай культуры

Бліжэйшыя мерапрыемствы

<<  Верасень 2020  >>
 Пн  Ат  Ср  Чц  Пт  Сб  Нд 
   1  2  3  4  5  6
  7  8  910111213
14151617181920
21222324252627
282930    

Партнеры

kultura.daugavpils.lv

http://latvia.mfa.gov.by/ru/daugavpils/

uzdim.lv

http://www.kultura.by/page/respublikanski-tsentr-natsyyanalnykh-kultur

http://www.belorus.lv

 

http://braslav.vitebsk-region.gov.by/ru/culture/

http://miory.vitebsk-region.gov.by/ru/culture/

http://smorgon.gov.by/ru/social/culture

http://polotsk.vitebsk-region.gov.by/index.php/ru/

http://zelva.grodno-region.by/ru/social/culture

http://glubokoe.vitebsk-region.gov.by/ru/kult-glubokoe/

 


http://www.knab.gov.lv